JLPT ဆိုတာ ဘာလဲ?
ဂျပန်စာ စသင်တော့မယ်ဆို JLPTဆိုတဲ့အသုံးကို သိထားရတော့မှာပါ။ ခုမှ ဂျပန်စာကို စသင်မယ့်သူတွေမှာတော့ JLPTဆိုတာ ဘာမှန်းမသိဖြစ်တတ်တာမို့ ဂျပန်စာနဲ့ လုံးဝမရင်းနှီးသေးတဲ့သူတွေအတွက် ရည်ရွယ်ပြီး ရှင်းပြပေးချင်ပါတယ်။
JLPTက Japanese Language Proficiency Testရဲ့ အတိုကောက်စာလုံးဖြစ်ပါတယ်။ မြန်မာလိုပြောရမယ်ဆို “ဂျပန်ဘာသာအရည်အချင်းစစ်စာမေးပွဲ”ပါ။ ဘယ်သင်တန်းမှာပဲ ဂျပန်စာ တက်ထားတက်ထား၊ ဘယ်လောက်ထိ ဂျပန်ဘာသာစကားပြောတတ်ပါတယ်လို့ ပြောပြော JLPTအောင်လက်မှတ် မရှိရင် အဆင်မပြေနိုင်ဘူးလို့ ပြောရလောက်တဲ့အထိ JLPTစာမေးပွဲက အရေးပါပါတယ်။
ဂျပန်ကို ပညာတော်သင် သွားချင်လို့ပဲဖြစ်ဖြစ်၊ ဂျပန်မှာ အလုပ်လုပ်ချင်လို့ပဲ ဖြစ်ဖြစ် JLPT levelနဲ့ သတ်မှတ်ပြီး ခေါ်ကြပါတယ်။ ဒါဆို JLPTစာမေးပွဲအကြောင်းကို နည်းနည်းလေး ထပ်ပြောပြပေးပါမယ်။
JLPTမှာ ခွဲထားတဲ့Levelတွေကတော့ N5, N4, N3, N2, N1ဆိုပြီး levelငါးခု ရှိပါတယ်။
N5, N4ကတော့ Basic Level၊ N3ကတော့ Intermediate Level၊ N2, N1ကတော့ Advanced Levelဖြစ်ပါတယ်။ ဒါကြောင့် ဂျပန်စာ စသင်မယ်ဆို N5levelက စသင်ရပါမယ်။ (တချို့ကျောင်းသားတွေ “ခုမှ ဂျပန်စာ စသင်မှာပါ။ N1တက်ချင်လို့ပါ”ဆိုပြီး လာမေးတတ်ကြလို့ပါ။
N1က အမြင့်ဆုံးအဆင့်ပါ
အလုပ် သို့မဟုတ် ကျောင်းနဲ့ ဂျပန်ကို သွားဖို့ ရည်ရွယ်ထားတယ်ဆို အနိမ့်ဆုံး N3 Levelလောက်ထိ အောင်မြင်ထားမှ အဆင်ပြေပါမယ်။ N4လောက်နဲ့ ခေါ်တာတွေလည်း ရှိတတ်ပေမယ့် ဟိုရောက်မှ ဘာသာစကားအခက်အခဲတွေကြောင့် စိတ်ညစ်ရနိုင်လို့ ကိုယ့်ဘက်က N3အနိမ့်ဆုံး ရအောင် ပြင်ဆင်သွားသင့်ပါတယ်။ ဒီထက် ကြိုးစားနိုင်လို့ N1ထိ အောင်မြင်အောင် ဖြေဆိုနိုင်မယ်ဆိုရင်တော့ အတိုင်းထက်အလွန်ပဲပေါ့
စာမေးပွဲကို နှစ်စဥ် Julyနဲ့ Decemberတို့မှာ ကျင်းပပေးပါတယ်။ (2020ကနေ 2021၇လပိုင်းအထိတော့ ကိုဗစ်ကြောင့် မြန်မာနိုင်ငံမှာ ကျင်းပနိုင်ခဲ့ခြင်းမရှိဘဲ၊ 2021 ဒီဇင်ဘာလမှာတော့ N4နဲ့ N3 Level၂ခုအတွက် ကျင်းပပေးခဲ့ပါတယ်။ ဒီတစ်ခါ 2022 Julyမှာတော့ ဘယ်Levelတွေအတွက် စာမေးပွဲကျင်းပပေးမလဲ မသိရသေးပါဘူး။)
JLPTစာမေးပွဲဟာ တစ်ကမ္ဘာလုံးမှာ ဒီမေးခွန်းတစ်မျိုးတည်းကိုပဲ၊ မနက်၉နာရီဆို နိုင်ငံတိုင်း ၉နာရီမှာ ဖြေဆိုရတာ ဖြစ်ပါတယ်(ဆယ်တန်းစာမေးပွဲလိုပါပဲ) ဒါကြောင့် ကိုယ်က ဘယ်နိုင်ငံမှာပဲ ရောက်နေရောက်နေ ဖြေလို့ရပါတယ်။
ဒီမေးခွန်းတစ်ခုတည်းပါပဲ။ ဖြစ်တာတော့ ရှားပေမယ့် တစ်ခါတလေ စံတော်ချိန်ကွာခြားချက်တွေကြောင့် အချိန်စောတဲ့ နိုင်ငံမှာ ဖြေပြီးသွားတဲ့အခါ မေးခွန်းပေါက်ကြားတာမျိုး ရှိတတ်ပြီး စံတော်ချိန်နောက်ကျတဲ့နိုင်ငံတွေက မေးခွန်း ကြိုသိနေရတာမျိုးလည်း ဖြစ်တတ်ပါသေးတယ်။ (ဒါပေမယ့် ဖြစ်ခဲပြီး အဲ့လောက်အချိန်အတွင်းမှာ မေးခွန်းကြိုသိရလည်း ဘာမှမထူးတာမို့ ဒီဖြစ်ရပ်တော့ မျှော်လင့်မနေပါနဲ့နော်။
စာမေးပွဲကြေးကို ကိုဗစ်မတိုင်ခင် ကြေညာခဲ့တုန်းကတော့ N5,N4 – 30,000ကျပ် နဲ့ N3,N2,N1- 40,000ကျပ် ဖြစ်ပေမယ့် 2021 Decemberမှာ ကျင်းပခဲ့တဲ့ N4,N3 စာမေးပွဲကြေးကတော့ 40,000ကျပ်ဖြစ်တဲ့အတွက် ပျှမ်းမျှစာမေးပွဲကြေးကို 40,000နဲ့ တွက်ထားနိုင်ပါတယ်။
N5အောင်မှ N4၊ N4အောင်မှ N3ဖြေရမယ်ဆိုပြီး သတ်မှတ်ထားတာမရှိတဲ့အတွက် ကိုယ်က N5မဖြေခဲ့ဖူးပေမယ့် N4, N3စတဲ့ ကိုယ်ပိုင်နိုင်တဲ့ Levelရဲ့ စာမေးပွဲတွေကို ရွေးချယ်ဖြေဆိုလို့ရပါတယ်။
ဒီလောက်ဆို ဂျပန်စာအရည်အချင်းစစ်စာမေးပွဲ JLPTအကြောင်း နည်းနည်းတော့ တီးမိခေါက်မိရှိလောက်ပြီထင်တယ်နော်။